A do mércores ao xoves foi unha madrugada movida na unidade de Psiquiatría do Hula. Un paciente feriu a dous vixiantes que acudiron á súa habitación a reducilo porque estaba moi alterado. Esta agresión non foi un episodio puntual. Repítese con relativa frecuencia, segundo denuncia o persoal de seguridade privada deste centro sanitario.
A medianoite un paciente que estaba ingresado en Psiquiatría arrincou unha barra metálica da súa cama e rebentou o cristal blindado da porta da súa habitación. Foi requirida entón a presenza do persoal de seguridade privada. Acudiron tres vixiantes.
Unha das esquirlas alcanzou nun ollo a un dos vixiantes e o enfermo asestoulle un corte nun costado a outro cun dos cristais que se desprendeu da porta cando o fracturou.
O persoal actuou tamén porque temía que este paciente, dado o estado de alteración que presentaba, puidese agredir ao enfermo co que compartía habitación, que en todo momento permaneceu na súa cama.
Os vixiantes conseguiron reducir ao paciente e inmobilizalo no chan, mentres o persoal sanitario administráballe un sedante. Despois deitárono e ataron á cama.
Os dous feridos recibiron asistencia médica no servizo de Urxencias do Hula, un deles, o que recibiu o corte no costado, atópase de baixa.
Este episodio violento, segundo denunciaba este xoves o secretario xeral da unión comarcal de CC.OO. en Lugo, Manuel Quiñoá, pon de manifesto a falta de medidas de seguridade e de persoal. Considera que se dispuxesen de chalecos antitrauma e antipinchazos un dos vixiantes non resultase ferido este xoves.
Manuel Quiñoá recordou o apuñalamento que sufriu un vixiante o Hula en febreiro de 2020 por parte do acompañante dun paciente.
Neste centro sanitario prestan actualmente servizo sete vixiantes na quenda de mañá, seis no de tarde e catro no de noite, aínda que, en cada quenda, un deles debe permanecer constantemente no centro operativo de seguridade.