O exalcalde de Lugo, José López Orozco, recibiu este venres o respaldo dos seus compañeiros de partido, que lle dedicaron un prolongado aplauso no comité provincial do PSOE para celebrar a petición por parte de Fiscalía do arquivo das acusacións contra el na peza da operación Pokemon que vira ao redor da adxudicación do guindastre. En pé, os principais dirixentes lucenses do partido —entre eles o exministro José Blanco; o presidente da Deputación, Darío Campos; ou a alcaldesa da capital lucense, Lara Méndez— ovacionaron o exrexedor.
Emocionado, Orozco interveu para agradecer o apoio recibido.
O fiscal responsable do caso Pokemon, Jesús Álvarez, concluíu que "non existe ningunha proba de que diñeiro das empresas do guindastre e da Ora chegase ao que era alcalde daquelas... O patrimonio de Orozco corresponde coa súa profesión". Agora a pelota está na Audiencia Provincial, que deberá determinar se ordena o arquivo provisional, pero o alcalde atópase moi satisfeito.
