O Concello de Lugo está a realizar obras de mellora no cruzamento entre as rúas das Fontes e Mar Cantábrico. Concretamente, os traballos consisten na renovación da pavimentación e das beirarrúas.
O edil de infraestruturas urbanas, Alexandre Penas, do BNG, visitou as obras para supervisar a súa execución e incidiu en que estas actuacións mellorarán a accesibilidade dos veciños desta zona da cidade.
Explicou que se demolerá o pavimento existente na calzada e colocarase outro novo de formigón, con 18 centímetros de espesor. Indicou que se habilitará unha nova beirarrúa "con saíntes nas zonas dos pasos de peóns". Ademais, renovarase a sinalización horizontal. Estas actuacións darán continuidade ás xa realizadas na Rúa Mar Cantábrico e na zona de estacionamento.
Os traballos enmárcanse nun paquete de actuacións ao que se destinarán 41.574 euros e que á súa vez se inclúe no plan do Concello de Lugo para mellorar "tres zonas da cidade que se presentaban un avanzado estado de desgaste".
O concelleiro de infraestruturas explicou que "desde a concellería de infraestruturas sempre tratamos de traballar con empresas galegas e de Lugo para, ao mesmo tempo que melloramos a vida da cidade, promovemos o emprego e o mantemento da vida económica".
