Os dous aparcadoiros das prazas de Ferrol e A Constitución seguen funcionando pola noite, pero desde o verán cun sistema novo. A partir das dez, péchase o acceso peonil e o de vehículos. Para entrar a recoller o coche hai que pasar o billete por unha máquina que hai xunto ao acceso peonil e, se o que se quere é deixar o vehículo no aparcadoiro, chega con pulsar o botón de retirada de billete e a porta ábrese. En ambos os accesos hai, ademais, un botón que permite ao usuario contactar telefonicamente cun operario que se atopa das centrais que a empresa Interparking ten en Madrid e Barcelona. Outra opción é chamar ao teléfono gratuíto que aparece na cartelería.
Esta é a explicación que deu o mércores a empresa que explota os tres aparcadoiros municipais a preguntas deste xornal e despois de que o BNG denunciase, en base a queixas de cidadáns e a un informe policial, que os aparcadoiros das prazas de Ferrol e A Constitución incumprían a obrigación de abrir polas noites. Interparking fixo o cambio o pasado 11 de xullo e, segundo asegura, informou o Concello, tal como está obrigado. Con todo, nin a empresa nin a administración local trasladaron a información aos cidadáns. Tampouco chegou a todos os departamentos do Concello, porque, por mor da queixa dunha cidadá, a concellaría de Concello e Cidadanía solicitou un informe á Policía Local. Esta non estaba ao tanto e as conclusións das súas indagacións foron erróneas.
O encargado de Interparking en Lugo, Luis Alonso, explicou que a empresa implantou o sistema Control Room nos dous aparcadoiros mencionados, «porque a tendencia en España vai nese sentido. Tamén nas gasolineiras se tende ao pago automático». En Lugo, a empresa amortizou a praza dun traballador.
O novo sistema implicou a mellora do sistema de videovigilancia. «Antes había dúas cámaras, nos accesos, e non gravaban, e agora hai 16 en cada un dous aparcamentos e sensores de movemento», explica o encargado.
Servizo Acuda. A maiores, a empresa ten o servizo Acuda, por se se produce algunha incidencia e o usuario non é capaz de resolvela a través do operador telefónico. Neste caso, a central contacta co operario que hai no aparcadoiro de Santo Domingo e este acode persoalmente. «O empregado conecta ou Control Room e desprázase ao aparcamento que sexa. Ao de Ferrol chega en tres minutos e ao da Constitución, en catro», explica Alonso.
Interparking asegura que as incidencias máis frecuentes é que os condutores se deixen o billete no coche. Estes deben contactar coa central a través do botón ou do teléfono e, tras facilitar algún dato, como a matrícula do vehículo, facilítaselles o acceso. A empresa asegura que a condutora que hai uns meses non puido acceder ao aparcadoiro da Praza de Ferrol non pulsou o botón nin chamou por teléfono.
