De luva branca podería definirse o debate que El Progreso organizou este luns entre os seis partidos con representación municipal, no que rexeitaron participar os cabezas de lista do PSOE, Lara Méndez, e do PP, Ramón Carballo, tras enfrontarse a semana pasada nun cara a cara que tamén organizou este xornal. A ausencia dos dous políticos deu lugar ás primeiras pullas -sobre todo por parte dos candidatos do BNG e de Cs, quen foi insistente- dun debate no que houbo outros piques, pero no que predominou o bo ton na confrontación e foi propositivo.
As enquisas coinciden nun escenario moi aberto, no que con toda probabilidade van ser necesarios pactos no bloque da esquerda ou no da dereita, o que máis some, e esta circunstancia, unida a que, pasado o ecuador da campaña, os candidatos xa mostran sinais de cansazo e a que o formato a seis propicia menos o enfrontamento, fixeron que o encontro fora pouco crispado e en consecuencia máis plano que o mantido entre Méndez e Carballo.
As acusacións máis fortes escoitáronse por boca do candidato socialista, o número dous da lista e deputado provincial Álvaro Santos, quen afirmou: "De momento o único partido condenado por corrupción é o PP", e do candidato de Lugonovo, Xosé Chorén, quen lamentou que neste mandato Lugonovo tivese que "tratar con xente tan falsa", en relación aos socialistas. "Ben lle valeu a Lugonovo non fiarse do PSOE, porque dese papel que ensina hai cinco puntos que aínda hoxe non cumpriu", sinalou despois de que Santos dixese que "desfixeron Lugonovo para condenar a Lugo a non ter orzamentos", en alusión ao veto ao apoio ao orzamento de 2017 que a asemblea puxo ao seu portavoz, Santiago Fernández Rocha, que acabou provocando a súa marcha e a doutros membros.
PROPOSTAS. Os espectadores do debate -que pode consultarse en calquera momento a través da páxina www.elprogreso.es- puideron escoitar bastantes propostas, todas coñecidas xa e en xeral pouco desenvolvidas por falta de tempo. Como o cara a cara de Méndez e Carballo, o debate estruturouse en catro bloques: urbanismo e modelo de cidade, política social, organización municipal e mobilidade e cultura e turismo. Abriu a quenda Santos, quen afrontou directamente un tema "tan polémico e complexo" como O Garañón. Recordou que a proposta socialista é facer unha zona verde nese lugar e que o seu modelo de cidade pasa por mellorar a conexión desta co río, rehabilitar barrios e impulsar o desenvolvemento de zonas que quedaron paradas pola crise do ladrillo.
Os candidatos do BNG, Rubén Arroxo; de Ace-EU-Equo, Carlos Portomeñe, e de Lugonovo criticaron o modelo "expansionista" e "irreal" que prevé o novo PXOM e apostaron por rehabilitar barrios e colmatar a cidade, tamén para evitar máis gasto de mantemento, sinalou Chorén. Portomeñe acusou ao PSOE e ao PP de aprobar un PXOM "ilegal" por carecer de avaliación de impacto ambiental e de estudos hidrolóxicos. A candidata de Cs, Olga Louzao, apostou por un novo acceso pola Fervedoira e a estrada da Fonsagrada e o portavoz popular, Antonio Ameijide, inquiriu a Santos sobre se José Ramón Gómez Besteiro, exconcelleiro de urbanismo, non debería pagar o custo que vai ter a derriba do Garañón e indemnizar ao promotor. Non tivo resposta.
Santos tivo que escoitar nunhas cantas ocasións, de varios candidatos, dúbidas sobre o seu coñecemento de Lugo, xa que ata agora era edil por Friol. El remarcou que vive na cidade desde 2013.
GASTO SOCIAL. Como era previsible, o PSOE volveu ser o branco de todos os demais partidos e incluso no apartado de política social, onde Santos sacou peito de ser o Concello galego que máis destina a esta área e de prestar servizos que corresponden á Xunta. O candidato tivo que escoitar matizacións por parte incluso de quen se considera máis próximo. "O Concello gasta moito en servizos sociais, pero teñen a mesma estrutura que deixou Blanca Rodríguez Pazos en 2003", afirmou Arroxo, quen tamén acusou ao PSOE de mentir aos veciños cando di que ten 30 millóns no banco porque a oposición non lle aprobou orzamentos. "Iso é mentira. Non se gastou o que se aprobou", afirmou.
Chorén considerou incompatible presumir de gastar e de ter diñeiro no banco e Louzao remarcou que o goberno non executou o 30% do orzamento social. Santos acusou ao PP e a Cs de ser cómplices dun partido, Vox, que en Andalucía pediu datos do persoal que atende a vítimas de violencia de xénero. "Equivocar meténdonos no mesmo saco", afirmou Louzao, quen noutro momento recordou que Cs non pactará "con forzas que miran ao pasado".
