A candidata de Ciudadanos en Lugo, Olga Louzao, montou este martes pola mañá o seu despacho diante do Concello, en plena Praza Maior, onde atendeu á xente e explicou as súas propostas para levar a cabo os próximos 4 anos en Lugo. "Serei unha alcaldesa a pé de rúa, porque a xestión municipal require sobre todo de proximidade, de contacto coa xente, porque se trata de mellorar a vida das persoas no seu día a día e a única forma de poder resolver os problemas dos veciños e veciñas é coñecelos de primeira man", dixo Olga Louzao.
A candidata avanzou unha serie de medidas que adoptará se é elixida: pór en marcha un plan industrial, acabar coas trabas para abrir negocios, reducir a burocracia, baixar os impostos ás familias, facer que a Policía Local traballe 37,5 horas, pór en marcha servizos mancomunados con concellos limítrofes ou reducirse o salario de alcaldesa un 25 por cento.
Olga Louzao comprometeuse tamén a estar só dous mandatos no cargo porque, dixo, "Ciudadanos é partidario da limitación de mandatos e da renovación nos cargos públicos para que entre aire fresco nas institucións".
Louzao tivo que levantar o despacho cara a mediodía, cando a Policía Local comprobou que Cs non solicitara permiso de ocupación de vía. Os axentes tomaron os datos á candidata e a unha traballadora. Xa a semana pasada, a Policía -colectivo co que Cs é moi crítico-, levantou unha mesa do partido en Santo Domingo pola mesma razón.
