"Foi coser e cantar", afirmaba Dani Esteve, dono de Desokupa, tras rubricar este mércores o acordo coa parella que deixou libre a casa que tiña achandada desde hai dous meses na Rúa Agro do Monte.
Bastáronlle "cinco minutos", segundo dixo, para desocupar a vivenda. Neste caso tívoo máis fácil porque o seu antagonista, Marcos, era seguidor seu en Facebook e cando se decatou de que se ía desprazar desde Barcelona á capital lucense para intentar solucionar o problema, xa lle adiantou que non ía pór ningún impedimento.
Tras gravar en vídeo a firma do documento no que a parella aseguraba que deixaba "voluntariamente" a casa, o okupa pediulle a Dani Esteve que se fixesen unha foto xuntos, ao que este accedeu. Ese vídeo, segundo explicou o empresario, sérvelle ademais de proba no caso de que o denuncien por coaccións.
Por unha intervención como a deste mércores, Desokupa cobra 3.000 euros máis Iva, máis os gastos de desprazamento e dietas
O dono de Desokupa, que leva máis de 2.000 desaloxos nos tres anos que leva funcionando a súa axencia —este foi o primeiro en Lugo—, desprazouse este mércores ao barrio das Gándaras xunto a outro corpulento desahuciador e a un avogado.
Este empresario, que precisou que prefire "chegar a un acordo, xa que é unha situación desagradable" ter que adoptar outras medidas, explicou que cando os usurpadores non aceptan a súa oferta, pon a un vixiante de seguridade á porta da casa para que lles impida volver entrar cando salgan. É o que denomina control de acceso. O último recurso sería interpor unha demanda civil.
Dani Esteve actuou gratuitamente neste caso das Gándaras, se non a súa tarifa, que inclúe asesoramento legal, ascendería a 3.000 euros, máis Iva, máis gastos de desprazamento e de manutención. Margarita Reguerasó tivo que abonar os 70 euros que lle cobrou o cerralleiro.
O propietario de Desokupa quixo deixar claro, fronte aos que pon en dúbida o seu modo de actuar, que non lle impuxeron ningunha condena e que foron arquivadas as 40 denuncias que lle puxeron desde que puxo en marcha a súa axencia hai tres anos. Tamén insistiu en que a súa empresa é a líder do sector en España.
