A Comisión Interuniversitaria de Galicia fixo pública este martes a lista de admitidos na terceira convocatoria de matrícula nos graos que se imparten na comunidade, coa que case a metade das 169 carreiras xa non terían prazas libres. Oito das 17 titulacións impartidas no campus de Lugo están entre as que completarían a cota de estudantes de novo ingreso, incluídos os seus dous graos simultáneos.
As titulacións que esgotan prazas en Lugo nesta terceira convocatoria de matrícula, se todos os admitidos formalizan a inscrición, son o grao de Enfermería —cunha nota de corte de 10,103—, Educación Infantil (7,104), Nutrición Humana e Dietética (8,27), Veterinaria (10,505) e o grao simultáneo en Enxeñería Agrícola e Forestal (6,626).
No conxunto da comunidade a terceira lista de matrícula prevé o 'peche' de ata 35 titulacións, nove delas con notas por enriba do 10. Están entre elas o grao de Enxeñería Aeroespacial en Ourense, a Biomédica en Vigo, Odontoloxía e Bioloxía en Santiago ou Enfermería e Fisioterapia na Coruña.
Todos os alumnos admitidos teñen de prazo ata o 2 de agosto ás 14.00 horas para formalizar as súas matrículas.
