Non hai colas, pero nas oficinas de emprego de Lugo a presión disparouse nos últimos meses. Os Erte e a crise derivada da pandemia levan a moitos lucenses a ese servizo en busca de saídas.
Cristian Fontela, un autónomo que non ve fácil afrontar a crise na súa actual profesión, era un dos lucenses que acudían este mércores á oficina da rúa Río Cabe en busca dun futuro mellor. Explicaba que ía a por unha oferta para un posto de traballo da Xunta.
A presión nas oficinas explícase pola situación económica, a pesar de que os índices de Lugo están lonxe de ser dos peores do país. De feito, é a cidade galega coa taxa máis baixa de paro, cun 9 por cento.
A presenza de cidadáns, que buscan saídas e a aplicación de controis polo coronavirus, marcan a actividade das oficinas e desde que se retomou a atención presencial, é necesario pedir cita previa por teléfono ou de forma telemática para ser atendido.
Precisamente, na oficina da rúa Río Cabe, segundo a Subdelegación do Goberno en Lugo, é onde máis se tarda en conseguir cita, por ser a que ten a maior carga de solicitudes. Así, o mércores atendéronse as citas solicitadas o venres 24.
Marta Caloto foi unha das citadas que esperaba na porta para entrar á hora indicada. Contaba que estaba alí para "unha melloría de emprego" e queixábase do funcionamento dos servizos públicos. Así, relataba que traballa nunha xestoría "que está a sufrir para realizar os trámites dos clientes ante a falta de atención das administracións públicas". Aproveitaba para dicir que a presión non se limita ás oficinas de emprego e, así, contaba que levaba «quince días á espera dun trámite en tráfico".
Entre os afectados directamente por esta crise estaba Daniel Iglesias, que traballa na Universidade e ía solicitar unha prestación ata o inicio de curso en setembro. "O coronavirus afectoume deixándome sen emprego, tras sete anos en activo", afirmou.
Así mesmo, Jalal Benkirane, que se atopa nun Erte, acudiu para buscar explicacións da razón pola cal está a cobrar menos. "O meu salario baixou, entón non se se hai algún problema, por iso quixen saír de dúbidas", expresou.
