O secretario xeral do PSdeG en Lugo, Álvaro Santos, cualificou como "unha navallada" do PP ao "campus, á cidade e á provincia" que nestes momentos estea a avaliarse "a posibilidade de que o Campus Terra perda catro títulos universitarios" que actualmente se imparten nas súas facultades.
Segundo Santos, "transcendeu a intención da Xunta de Galicia de pór en risco catro titulacións claves para o Campus de Lugo", como son "Enxeñería Química, Civil, Forestal e Agrónoma", porque se expón "a desaparición" das dúas primeiras e o traslado de boa "parte da actividade" das dúas últimas a Ourense e Pontevedra.
Esa decisión, opina, "debilitaría ao Campus Terra", que se chama así porque se buscou a súa especialización" nos sectores agrogandeiro e forestal. "Houbo que renunciar a titulacións e a outras iniciativas da USC para poder especializar este campus" e agora "o goberno do Partido Popular ataca á medula espinal da nosa filosofía educativa e a excelencia" do campus de Lugo "coñecida e recoñecida en Galicia, España e Europa", dixo o portavoz socialista.
Diso "dá boa conta o número de alumnos" estranxeiros que "veñen formarse ao noso campus", engadiu. "Desde o PSOE non podemos consentilo", insistiu, e por iso os socialistas "non van ser cómplices desta navallada" e deste "novo ataque de Feijóo aos lucenses".
"Imos pelexar con uñas e dentes" en todos aqueles foros "nos que contemos con representación política", dixo Santos, para que "Lugo non se vexa privado de catro titulacións esenciais para o noso Campus e a nosa provincia".
