O hotel Jorge I sobrevive, despois dun ano pechado, aos saqueos

O hotel Jorge I pechou as súas portas fai case 13 meses. Este venres o administrador concursal designado polo xulgado para levar as rendas da sociedade que o xestionaba entrou no catro estrelas da Campiña. Para poder acceder ao seu interior tivo que recorrer a un cerraxeiro para que abrise a porta. O seu propietario atópase ilocalizable. Fai un par de meses atopábase en Suíza.

A pesar dese máis dun ano de parón e a que foi desvalixado na primavera pasada, o interior do hotel presenta un mellor aspecto do esperado. Aínda así, tras unha primeira inspección ocular, apréciase que lle falta mobiliario e maquinaria.

A finais de abril do ano pasado os amigos do alleo levaban os 32 televisores que estaban nas habitacións do hotel. Tamén subtraían o computador da recepción; a caixa rexistradora da cafetería e unha báscula e unha cortadora de fiambre da cociña.

Este aloxamento, que ocupa unha superficie de case 4.000 metros cadrados en total, tendo en conta a nave que alberga os salóns de celebracións e os terreos que ocupa na Campiña, está valorado en máis de 2,3 millóns de euros.

O hotel, que foi construído en 1980 e que foi amplamente reformado hai unha década, conta con 32 habitacións repartidas en tres plantas.

O pasado luns o xulgado mercantil de Lugo declaraba o concurso necesario de acredores do hotel Jorge I por mor da demanda presentada por unha decena de traballadores aos que o seu propietario, o empresario Maurizio Borroni, débelles uns 350.000 euros en concepto de salarios e indemnizacións.

Este catro estrelas, un dos seis que había na capital lucense, pechou as súas portas nas vésperas do Nadal de 2014, cando o empresario italiano aínda non cumprira un ano á súa fronte.

A demanda presentada polo persoal tamén contribuíu a que se paralizase a poxa do inmoble polo préstamo hipotecario de case un millón de euros que debe a unha entidade financeira.

Maurizio Borroni non só deixou contas pendentes cos seus traballadores e co banco, tamén debe o importe case íntegro da compra do hotel aos seus anteriores propietarios, que o denunciaron por estafa e falsidade documental.