Dentro da campaña que iniciou para conseguir a creación dun xulgado específico de Violencia de Xénero en Lugo, o BNG enviou este luns "centos de postais" a Monte Pío, residencia oficial do presidente da Xunta de Galicia, Alberto Núñez Feijóo, para facerlle constar a necesidade dese servizo que "xa está a funcionar noutras cidades galegas".
Este envío masivo de correspondencia prodúcese, recordou a concelleira Mayte Ferreiro, despois de que o partido nacionalista presentase numerosas iniciativas en todas aquelas institucións na conta con representación para reclamar ese xulgado.
"Desde o BNG continuaremos con esta campaña ata que Lugo conte co Xulgado de Violencia de Xénero", dixo Mayte Ferreiro, "e por iso hoxe trasladamos tamén esa preocupación ao presidente da Xunta, porque entendemos que a súa implicación tamén é necesaria para conseguir ese obxectivo".
Recordou, que cidades como Vigo ou A Coruña xa dispoñen dese xulgado específico, de modo que se se puxese a funcionar en Lugo, esa nova unidade podería dar cobertura a toda a provincia para atender a casos de violencia de xénero. Ferreiro recordou que sería necesaria unha "dotación mínima", formada por un xuíz, un fiscal, un secretario e un funcionario adscrito.
