A provincia de Lugo prepárase para albergar numerosos actos reivindicativos para conmemorar o Día da Muller o vindeiro luns. Desta forma institucións, organismos públicos e distintos colectivos sociais programaron actividades de toda índole para reafirmar os dereitos da muller o 8-M.
Así as cousas, a área de vicepresidencia da Deputación de Lugo organizou un concerto de Laura LaMontagne, Pauliña e Branca Villares, que terá lugar este venres no auditorio municipal Gustavo Freire, a partir das 19.15 horas. A reserva de entradas comezou onte na web entradaslugo.es e son completamente gratuítas.
O organismo provincial tamén difundirá este 8-M historias de mulleres traballadoras da provincia cunha campaña audiovisual nas redes sociais onde se contan vivencias en primeira persoa. Por outra banda, na fachada principal do Pazo de San Marcos locen pancartas en cor violeta coa lema Querémonos vivas, libres e iguais.
Ademais, nos centros de atención a maiores da Deputación en Trabada, Ribadeo, Pol, A Fonsagrada e Castroverde desenvolveranse un conxunto de exposicións fotográficas baixo a lema Compañeiras de vida.
CONCELLO. A área de igualdade do Concello de Lugo anunciou que se sortearán 100 lotes de merchandising da marca Mulleres con Forza para celebrar o 8-M. O sorteo destes lotes será a través das súas redes sociais. Tamén organizará un certame pola igualdade en Tik Tok, un taller infantil e ata unha xincana. O aparcadoiro do Pazo albergará o domingo 14 un autocine que proxectará María Solinha.
Así mesmo, a Irmandade Obreira de Acción Católica, desde o grupo de Lugo, Sementeira-IOAC, lanzaron un manifesto onde se relata a promoción dunha educación baseada en valores de igualdade, respecto e solidariedade.
O sindicato UXT tamén convocou unha concentración o luns diante da sede da Subdelegación do Goberno en Lugo, a partir das 12.00 horas, baixo a lema Por que non iguais?.
Así mesmo, a Uned en Lugo tamén prepara o curso Estratexias para a eliminación de estereotipos de xénero no exercicio da actividade profesional, dirixido por María del Carmen Rivas.
PROVINCIA. Diversas localidades da provincia tamén programaron actos para o 8-M. EnMonforte, colocarase unha esfera de helio na Praza Campo de San Antonio, co lema "Monforte pola igualdade".
Pola súa banda, a páxina de Facebook da biblioteca pública de Chantada albergará unha exposición de lecturas non sexistas.
Meira publicará tanto na páxina web municipal como nas súas redes sociais unha presentación que servirá como homenaxe a todas as mulleres. Para rematar, Sober súmase ás reivindicacións con dous contacontos. Samantha Fernández abrirá o ciclo este venres con Merendas con contos ao que seguirá o acto protagonizado o luns por Pedro Brandariz baixo o título Non máis princesas.
