Os residentes en dous edificios da Rúa Camiño Real foron este martes desaloxados por orde xudicial en sendas operacións nas que non se rexistraron incidentes e nas que colaboraron axentes da Policía Local.
Os inmobles nos que se executaron os desafiuzamentos foron unha vivenda do número 22 e outra do 104, este último un edificio propiedade dunha entidade financeira e que levaba anos ocupado.
En concreto, este inmoble de dúas plantas fora adquirido por unha promotora inmobiliaria coa idea de demolelo e iniciar unha nova promoción de vivendas. Con todo, coa chegada da crise económica, a empresa entrou en concurso de acredores e este edificio pasou a mans de Abanca.
Dúas familias ocuparon durante anos o primeiro e segundo piso deste inmoble, ao parecer co consentimento da empresa propietaria e sen que iso xerase problemas de convivencia no barrio. Tras pasar o edificio a mans da entidade financeira, a familia que vivía no primeiro piso decidiu mudarse, mentres que a outra, integrada por unha parella con varios nenos, optou por cambiarse á vivenda que quedaba libre.
O proceso de desafiuzamento do piso ocupado avanzou nos xulgados e foi este martes cando se executou o lanzamento que, segundo informou a Policía Local, transcorreu sen que tivesen que actuar os axentes alí desprazados.
A Rúa Camiño Real e algunhas das rúas desta parte do barrio da Milagrosa sufriron nos últimos anos casos de ocupación de vivendas abandonadas que xeraron desde problemas de convivencia ata a intervención xudicial polos presuntos malos tratos de mascotas que convivían cos okupas. O último incidente rexistrouse o pasado 22 de outubro cando a Xunta tivo que rescatar a dous cans en moi mal estado que estaban pechados no número 126 de Camiño Real.
Posteriormente, nesa casa colocouse unha porta antiokupas. Nese barrio, moitos donos de vivendas deshabitadas recorreron a tapiar as portas e fiestras de casas para evitar que sexan ocupadas e á espera de que se poña en marcha un plan de recuperación integral como o acometido noutras zonas como o Sagrado Corazón.
