Os datos publicados este domingo polo Sergas dan continuidade ao descenso dos casos activos de coronavirus rexistrado nas dúas últimas xornadas na provincia de Lugo, que esta semana sumou os positivos dun preocupante brote na capital e Castroverde. A caída sitúa as infeccións activas en 154 —dez menos que o sábado— e responde a que se rexistraron máis novas altas que novos contaxios, a pesar do cal hai unha persoa hospitalizada máis.
O balance actualizado con datos solicitados ata as seis da tarde do sábado revela que hai catro pacientes ingresados no Hula, un máis que na xornada anterior. Un deles está na unidade de coidados intensivos. Mentres, o Hospital da Mariña e o de Monforte seguen sen pacientes con covid.
En 24 horas rexistráronse 7 positivos en probas diagnósticas de infección activa na provincia, dúas máis que na xornada previa pero a metade que na anterior e lonxe dos 17 do xoves.