O novo decano de Humanidades, Gonzalo Fernández, defendeu este mércores a ligazon deses estudos coa cidade de Lugo, durante o acto de toma de posesión do cargo. "A Facultade de Humanidades é en certa medida depositaria e dá continuidade á tradición dos estudos e da formación de corte humanística que comezaron a impartirse na cidade de Lugo a cabalo dos séculos XV e XVI e cuxo nacemento ten unhas raíces parellas ao da propia USC", recordou no seu discurso.
Profesor da área de Ciencias e Técnicas Historiográficas do Departamento de Historia da USC e integrante do grupo de investigación Atalaia, Fernández fixo, na súa concorrida sesión, unha defensa acendida dun centro afectado pola baixa matrícula, do que destacou as súas "magníficas instalacións, profesorado cualificado e no que se imparte unha formación de calidade acreditada e recoñecida dentro e fóra da USC".
Reclamou apoio e colaboración ao goberno da Universidade para a implantación do novo grao de Difusión Cultural, un título que comezará a impartirse o próximo curso e que, como recordou, refírese a un ámbito aínda non explorado no sistema universitario galego. Anunciou a súa intención de ampliar o número de prácticas profesionais ás que poderán acceder os seus alumnos a través de novos convenios e de fortalecer o posicionamento do centro universitario lucense nas novas redes nacionais e iberoamericanas xurdidas no ámbito da xestión cultural.
Tamén pediu apoio institucional para que a facultade lucense acolla o posgrao de Lingua Española para Estranxeiros ou, polo menos, a súa modalidade semipresencial. Explicou que xa presentara a candidatura e que a súa concesión suporía certa compensación á perda que supuxo deixar de impartir o grao de Lingua e Literatura Española.
