A polémica polo novo auditorio de Lugo reavivouse este mércores, despois de que o PP criticase que o Concello segue sen abrilo tres meses logo da súa recepción e o goberno local atribuíse o atraso ás deficiencias na instalación que debe emendar.
O grupo municipal popular criticou que, tres meses logo da recepción por parte do Concello de Lugo do novo auditorio da cidade, aínda "non haxa nada feito" para a apertura e posta en funcionamento destas instalacións, cuxa obra civil leva anos terminada.
O portavoz do PP no Concello de Lugo, Ramón Carballo, lamentou que transcorridos eses tres meses, o goberno local nin sequera "chequeara" as instalacións para pór en funcionamento unha infraestrutura cultural que supuxo un investimento superior aos 20 millóns de euros.
Carballo afirma que "cada día que pasa empeora tanto a situación exterior do edificio, que ofrece unha imaxe desanxelada, como interior, porque a falta de ventilación e de mantemento está a provocar danos que logo teremos que pagar todos os lucenses".
O PP acusou os socios do "bigoberno" de Lugo de ser "uns irresponsables", por dilatar "sine die a apertura do novo auditorio", especialmente en tempos "do covid", porque "é unha magnífica infraestrutura para controlar o aforamento e dar cumprimento ás medidas sanitarias de seguridade". Carballo esíxelle ao goberno local que "poña un prazo e decida un modelo de xestión para esta instalación cultural".
"IMPORTANTES DEFICIENCIAS". O goberno local de Lugo respondeu horas despois: alegou que está a traballar desde o mes de xuño na apertura do novo auditorio pero precisou que antes terá que realizar un investimento superior aos 300.000 euros para emendar "importantes deficiencias" no edificio.
O bipartito lamentou as "présas" do Partido Popular por darlle uso a esa infraestrutura, cando a Xunta "tardou máis de 15 anos en entregala", e fíxoo "cunha serie de importantes deficiencias que implican a necesidade de investir nela máis de 300.000 euros antes de pola a funcionar".
Segundo o Concello, o edificio só dispón de subministración eléctrica de obra, polo que non foi posible "nin sequera probar os sistemas de climatización, os ascensores, o sistema de seguridade contra incendios, intrusión ou ventilación".
Ademais, "a tardanza na finalización das obras e o equipamento" do edificio provocaron que "a maior parte deses dispositivos esgoten as garantías dos fabricantes sen ser usados". Por iso, "debido ás dimensións do auditorio", será precisou "a realización da posta en marcha de cada unha das instalacións por parte de empresas especializadas", que se ocupen de verificar "o correcto funcionamento das mesmas".
Ese proceso foi cuantificado ao redor dos 230.000 euros, aos que habería que sumar outros 18.000 euros para emendar outras deficiencias de construción e máis de 66.000 euros para ajardinar e acondicionar a parcela exterior.
