As queixas polo mal estado que presenta o parque Rosalía de Castro non son novas. De feito, hai apenas tres semanas, os usuarios xa mostraron o seu descontento por aspectos como o céspede mal coidado, as papeleiras sen baleirar durante días ou o estado de moitos bancos, ateigados de deposicións de paxaros ata o punto de quedar practicamente inservibles.
Agora, a este abandono que perciben os cidadáns en todo o recinto, súmanse tamén as queixas pola falta de limpeza na zona das costas que levan ao pavillón municipal, que amencen practicamente a diario repletas de plásticos e botellas de cristal.
E aínda que a culpa do estado que presenta a zona é sen dúbida da falta de civismo dalgunhas persoas —na súa maioría novas que se citan no parque para facer botellón, incluso entre semana, e vanse do lugar sen recoller o lixo que xeran—, os cidadáns esixen ao Concello que non desatenda a súa limpeza.
"É unha vergoña dar un paseo polo parque ás dez da mañá e atopalo cheo de botellas de cervexa, papeis e vasos de plástico. Unha zona verde en pleno centro da cidade non pode estar así de sucia. Non quero pensar na imaxe que se poden levar de nós os turistas que visiten o parque", comentaba este xoves un lucense.
"É unha vergoña ver o parque ás dez da mañá cheo de botellas de cervexa e vasos de plástico", din os usuarios
A súa indignación coincidía tamén coa dos monitores de varios campamentos escolares que acudiron ao lugar cos nenos e decidiron regresar inmediatamente ao momento de partida, ante o perigo que supuña para os menores o estado do parque. "É unha pena que non se poida aproveitar este espazo, pero tal e como está, non nos podemos arriscar a que un neno se corte cun cristal ou a que anden tocando os vasos e a porcallada esparexida por todo o chan", lamentaban.
Os usuarios piden ao Concello que se encargue de arrombar o parque "en condicións" e que vele máis por manter limpa a cidade, xa que segundo un estudo da Organización de Consumidores e Usuarios que se presentou o pasado abril, a percepción dos lucenses sobre a cidade empeorou e consideran que está sucia.
O informe revelou que Lugo era a duodécima cidade de España con peor valoración da limpeza. A satisfacción global dos lucenses foi de 40 puntos, cinco menos que hai catro anos, e os factores que máis influíron nesa degradación son os excrementos de cans na vía pública, as pintadas e carteis e a sucidade na contorna dos colectores.
