O Tribunal Superior de Xustiza de Galicia (TSXG) tombou a sentenza do xulgado do Social número 3 de Lugo que obrigaba a Novafrigsa a abonar as cotizacións sociais dos últimos catro anos dos 306 falsos autónomos vinculados a Servicarne, que prestaban os seus servizos no matadoiro lucense, aos que este tivo que incorporar ao seu persoal como traballadores por conta allea.
Polo menos o sindicato CC.OO., que asesoraba a parte dos afectados, xa anunciou que presentará recurso ante a Audiencia Nacional contra este fallo xudicial. Aínda que non é firme, esta sentenza do TSXG supón un alivio económico para as arcas do matadoiro lucense, que depende do grupo Coren, pois o abono desas cotizacións sociais ao que foi condenado en instancia supuña o desembolso de máis de 4,7 millóns de euros polo período 2013-2017.
Como Novafrigsa non terá, por agora, que abonar as cotizacións sociais dos últimos catro anos deses 306 demandantes, a Seguridade Social tampouco lle terá aínda que devolver a estes os pagos do seguro de autónomos que realizaron ao longo dese cuadrienio.
Esta absolución prodúcese por mor de que a sala do Social do TSXG estimou o recurso de suplicación interposto por Novafrigsa e Servicarne contra a sentenza condenatoria ditada fai 14 meses polo xulgado do Social número 3 de Lugo.
Na sentenza recórdase que Servicarne prestou todo tipo de servizos a Novafrigsa no seu matadoiro de Lamablanca desde o 1 de xaneiro de 2011 ata o 31 de xullo de 2018, desde sacrificio, carga e descarga, pesada ou marcaxe do gando ata fabricación e manipulación de embutidos e xamóns curados ou envasados. Esta cooperativa xa traballaba para o grupo Coren desde os anos 90 do século pasado.
CONCLUSIÓNS. Os xulgados declararon primeiro a relación laboral dos autónomos de Servicarne con Novafrigsa, polo que esta tivo que incorporalos ao seu persoal, e despois que asumise o abono das súas cotizacións sociais, que acaba de rexeitar o máximo órgano do poder xudicial en Galicia.
O TSXG estima os recursos de suplicación presentados por ambas as firmas porque considera que "non cabe extraer a conclusión xurídica de existencia de fraude de lei que leve a declaración de laboralidad dos codemandados con Novafrigsa por unha fraude que consiste na inexistencia real de Servicarne como cooperativa e que o seu único labor é constitutir unha sorte de axencia de emprego para Novafrigsa".
Engade o fallo do máximo órgano do poder xudicial en Galicia que "existe discordancia ou incoherencia entre os feitos que se constatan e a consecuencia xurídica que se lles aplica".
Sostén ademais que na sentenza de instancia "non se indica dato fáctico algún do que poida extraerse un prestamismo laboral ilícito".
