O responsable da cafetería restaurante La Pasarela, na Rúa Frei Plácido Rei Lemos, está convencido de que a tardanza no restablecemento da subministración débese a que "alguén non o quere facer, ou os operarios ou o Concello", afirma.
O hostaleiro alude así ao conflito que manteñen os traballadores da brigada de augas co goberno local polo debo de horas extraordinarias, que a totalidade do persoal, salvo o encargado, néganse a facer desde hai un tempo.
Así, durante as noites e os festivos só está dispoñible o responsable da brigada, polo que, en caso de urxencias, o Concello recorre a empresas privadas. Aínda que, dun tempo para acó, algunhas firmas tamén rehúsan facer este tipo de traballos ben porque teñen outros pendentes de cobrar ou porque superaron a cantidade máxima que poden cobrar dunha mesma administración pública ao ano por adxudicación directa (40.000 euros).
"Eu non teño culpa de se as tubaxes son vellas ou de se o Concello non paga as horas extras, porque a min a auga cóbranma ao mesmo prezo, sexa tubaxe de fibrocemento ou sexa tubaxe nova, non teño ningún desconto", afirma o hostaleiro.
CAUSAS. O goberno local non puido explicar por que a tubaxe rompeu sucesivamente, máis aló de que se trata dun material antigo e fráxil, que aínda queda nalgunhas rúas da cidade e que o Concello está a substituír progresivamente. O tráfico, sobre todo se é intenso ou pesado, adoita afectar a estas tubaxes, que tamén se resenten cando levan a cabo traballos sobre elas, como as propias reparacións.