Os nenos lucenses que o desexen poderán entregar persoalmente en man a Papá Noel as súas cartas cos seus desexos de agasallos para este Nadal. Esta máxica cita será posible grazas a que este ano as circunstancias permiten a El Progreso recuperar a carpa que outros anos instalou na Rúa da Raíña para albergar o encontro de Papá Noel cos nenos.
Este Nadal, a carpa estará instalada no mesmo lugar os días 18 e 19, de 16.00 a 20.00 horas. Os nenos non só poderán darlle as súas cartas a Papá Noel —poden descargar aquí un modelo da misiva na que recoller todos os seus desexos—, senón que poderán facerse unha foto con el, que levarán de xeito gratuíto no mesmo momento.
Esta iniciativa está promovida por El Progreso, o Concello de Lugo e as empresas Audi, Areal, Vegalsa e Opticalia Callao.
