Unha ducia de negocios da cidade sumáronse xa a unha iniciativa que busca estimular o comercio e a hostalería e que ten como basee a colaboración dos propios empresarios. A través deste proxecto, os clientes reciben bonos para consumir en locais participantes no programa.
á fronte da idea está Ludy Quintas, de barberías Aluma, que lanzou un sistema de cartóns con agasallos e descontos para compras e consumicións en establecementos da cidade. Sumáronse, de momento, bares, restaurantes, distintos comercios e ata unha pastelería.
A oferta para os clientes que reciben un cartón ao pagar é ampla. Hai tendas asociadas que ofrecen descontos do 15 ao 30 por cento, outras rebaixan 10 euros a partir de 50 euros de gasto e tamén se inclúen descontos en comidas ou a posibilidade de pagar cafés, canas ou almorzos ou merendas co cartón recibido como cliente.
O proxecto está a dar os seus primeiros pasos, pero "á xente encántalle", asegura Quintas, que explicou que o programa xurdiu "porque é un momento de apoiarnos entre todos".
Lugo necesita o comercio e a hostalería. Ademais, o sector servizos é moi importante na economía local, remarca a empresaria, que destaca que a iniciativa está aberta a todos os negocios da cidade. Por agora, son unha ducia, pero a vontade é integrar a todos os que queiran traballar no plan desde calquera barrio da cidade.
"Todos rompémonos a cabeza neste momento para lograr saír adiante", di Quintas, que explica que a idea de lanzar un sistema de colaboración entre negocios xurdiu logo de dar moitas voltas para atopar fórmulas que axudasen a soster o consumo.
De momento, di, o sistema está a funcionar ben e os clientes están encantados. Iso a pesar de que a posta en marcha do programa coincidiu cun momento de peche da hostalería e había varios locais dese sector que se sumaron á iniciativa. De todos os xeitos, os cartóns seguirán valendo para as comidas encargadas a domicilio, explica Ludy Quintas.
O sistema arrinca nun momento de caída en picado do consumo pola crise sanitaria, que motivou xa o peche de negocios na capital.
O programa é paralelo a outros que se pon en marcha co apoio da Administración, como, por exemplo, a campaña Días Azuis, que se prolongará ata o día 30 e que repartirá 16.200 euros nun total de 80 cartóns prepago de 300 e 150 euros.
