Negativa á instalación de cámaras como efecto disuasorio dos botellóns

O pleno no Concello de Lugo rexeitou este xoves a proposta do PP de unir o parque Rosalía de Castro co de Marcos Cela e o Miño a través de pasarelas. Ademais tamén se trataron outras propostas recibidas, das cales algunhas saíron adiante e outras non, como a instalación de cámaras disuasorias para frear os botellóns.

A proposta do PP sobre un plan para un lecer xuvenil saudable para frear os botellóns. Os populares pedían, ademais, a posta en marcha de cámaras con efecto disuasorio e a reactivación das do Ceao, "apagadas hai unha década", segundo a edil Carmen López. O concelleiro de mocidade, Mauricio Repetto, negouse ás cámaras e dixo que, nun ano, só houbo 200 denuncias no botellón cando hai 22.000 mozos, de 14 a 35 anos, censados no municipio.

Non haberá un plan para incentivar o aluguer aos mozos

O equipo de goberno tampouco aprobou unha moción de Cidadáns para facilitar o acceso á vivenda aos mozos mediante un plan municipal que incentive o aluguer e dea aos arrendadores unha garantía de cobro. Este grupo tamén expuña un estudo que contemple a ampliación do parque público de vivendas en Lugo.

O edil de mocidade, Mauricio Repetto, indicou que xa existe un estudo municipal sobre o parque inmobiliario baleiro na cidade.

Negativa a traer peregrinos de visita a Lugo en buses gratuítos

Outro asunto que tampouco se aprobou foi proposta do PP de traer peregrinos a Lugo, en autobuses gratuítos, que fagan noite en Palas de Rei, Portomarín ou Sarria co fin de visitar a cidade pola tarde. Esta idea contou co apoio de Cidadáns, que pediu tamén a convocatoria do consello municipal de turismo para facer un plan de promoción turística. A edil de turismo, Maite Ferreiro, afirmou que se convocaría a comisión pero insistiu en que a promoción "é cousa dá Xunta".

Crearase unha ordenanza municipal de deportes

O Concello está a elaborar xa unha ordenanza de deportes que regulará o uso e os horarios das instalacións deportivas. Esta proposta, exposta polo PP, foi unha das dúas aprobadas por unanimidade —24 votos a favor e non 25 porque faltaba Felipe Rivas, do BNG—, xunto coa do apoio á promoción do Xacobeo. Por outra banda, rexeitouse a urxencia dunha moción do PP na que pedía unha declaración do Concello en contra da ditadura en Cuba.