O ministerio fiscal solicitou este xoves unha condena de tres anos e medio de prisión para unha muller -con iniciais A.M.P.C.- acusada de vender heroína hai dous anos na capital lucense, concretamente pola zona da Piringalla. A imputada negou os feitos na Audiencia Provincial de Lugo e recoñeceu que era consumidora de estupefacientes, "pero xamais vendín droga", afirmou.
No transcurso do xuízo tamén prestaron declaración dous homes que, segundo a acusación pública, compráronlle heroína, aínda que tamén o negaron. Ambos explicaron que coñecían á acusada "de ser amigos e consumidores", pero que nunca lle adquiriron ningún tipo de droga. "ela ten unha tenda e eu cómprolle moitas herbas para infusións"
Pola súa banda, os axentes da Policía Nacional de Lugo que participaron na operación que finalizou co arresto da acusada explicaron que montaron un dispositivo de vixilancia, durante varios días, e comprobaron que a muller se dedicaba ao tráfico de heroína. Tal e como quedou recollido no escrito de acusación da Fiscalía lucense, o 13 de xuño de 2019, sobre as seis e media da tarde, a muller lle vendeu unha bolsita de droga a un home na rúa San Isidro Labrador. Posteriormente, sobre as oito e media da tarde do 3 de xullo, os axentes observaron outro pase nun bar da Avenida da Coruña. Finalmente, ao redor das dez da noite do 11 de xullo, a acusada vendeulle outra papelina a un home nun bar sito na Rúa Manuel María.
Tras esta última transacción, a Policía Nacional procedeu ao arresto da muller e os axentes interviñéronlle nese momento 35 euros "procedentes da súa actividade ilícita". Tal e como apunta a Fiscalía, o valor total da droga incautada aos compradores alcanzaría no mercado ilícito un prezo de 125 euros.
A muller foi acusada dun delito contra a saúde pública e o ministerio público solicitou para ela unha condena de tres anos e seis meses de prisión, así como unha multa de 250 euros. Tras escoitar as alegacións de acusación e defensa, o xuízo quedou visto para sentenza.
