A nai dun menor lucense denunciou ao pai doutro neno porque os pequenos chocaron nun parque cando ían cada un no seu patinete e o seu fillo resultou ferido. O menor sufriu lesións leves, pero a proxenitora reclamou unha indemnización, que finalmente non cobrará, xa que o xulgado de Primeira Instancia número 3 de Lugo desestimou a súa demanda.
O maxistrado conclúe que o accidente foi “un lance do xogo” e que este tipo de sucesos forman parte dos “riscos ordinarios da vida”. A demandante recorreu o fallo ante a Audiencia Provincial de Lugo, que tampouco lle deu a razón.
Segundo quedou recollido no fallo, o accidente produciuse cando os dous menores, de 13 anos, ían en patinete pola chaira dun parque da capital, “circulando á vez”. Nun momento dado, as súas traxectorias cruzáronse e un dos menores caeu por un terraplén próximo. “Os pais -explica o xuíz- estaban nas inmediacións e impartiran instrucións aos menores para que non fixesen carreiras".
En consecuencia, non se detecta cal é a culpa ou neglixencia do pai do menor demandado, xa que o xogo era nunha zona habilitada, e trátase de menores cunha idade suficiente para o manexo de tales vehículos, polo que a colisión é un lance do xogo e xa que logo esta incursa nos riscos ordinarios da vida”.
O maxistrado apunta que o choque entre os dous nenos no parque constitúe “un acontecemento difícil de evitar, salvo que privásemos aos menores de calquera posibilidade de esparexemento, o que dificulta o seu evitación”. Así, tanto o xuíz de Primeira Instancia como a Audiencia Provincial absolven ao demandado. Neste caso representaba ao home a compañía coa que tiña contratado un seguro. O xulgado condenou á nai que puxo a demanda a pagar as costas, pero a Audiencia retira esta obrigación e non impón condena en costas.
