A Plataforma Cidadá en Defensa do Museo da Romanización no Cuartel de San Fernando, que adoptará o diminutivo de Mvro, botou este luns a andar coa súa primeira reunión, na que se aprobou a súa constitución e deuse conta da adhesión de máis de 120 colectivos, entre eles 53 grupos culturais da provincia.
Os seus impulsores foron colectivos tan significativos como Federación de Comercio de Lugo, a federación de Vecinos, a CEL, Lugocentrum e distintas asociacións empresariais e de autónomos; grupos como Cultura do País, Achádego ou o maior dos grupos de recreación histórica do Arde Lucus ou algúns dos arqueólogos e historiadores máis importantes da cidade a título individual, sinalaron.
Entre os acordos na súa primeira reunión estivo crear unha web que sirva como soporte informativo, facilitar o correo [email protected] para todo aquel que queira porse en contacto ou comezar a organizar unha xornada lúdico-festiva para marzo con actuacións e diversos actos durante todo o día.
Como portavoz de Mvro actuará José María Seijas, presidente da Federación de Comercio, que indicou que a plataforma non se opón a que se faga un parador en Lugo, como expón a Xunta, sempre que se faga noutro sitio e non en San Fernando, onde debe ir un museo da romanización que sexa unha referencia tamén como centro de estudo e investigación.
