Lugo conta cun novo axente cultural e social, a plataforma Lugo Sempre, cuxo nacemento se deu a coñecer este martes e xorde coa intención de traballar en defensa dos intereses dos lucenses e promover a cultura e a reflexión en toda a provincia.
Á fronte do novo movemento están figuras coñecidas da sociedade lucense. Así, o presidente é Agustín Gallego, como vicepresidente actúa o xornalista Paco Nieto e a responsable de cultura é Melina López. Dúas consignas marcarán o novo movemento: non se aceptará nunca diñeiro público para financiar ningunha das súas actividades e establécese o compromiso de ser ''terriblemente críticos'' na defensa de Lugo.
O colectivo nace, en primeiro lugar, cunha clara vocación cultural. ''Queremos apoiar o noso como ben común, sen amos nen propietarios'', proclama Lugo Sempre, que sostén que idioma, tradicións ou porvir deben ser ferramentas de integración, respecto e convivencia.
Ese movemento cultural alternativo complementarase cun observatorio político, un foro de estudo, de debate e tamén de divulgación do que se coce no mundo político, avanza.
Ese foro ten vocación de colaborar con outras asociacións, co mundo académico e organizacións políticas, sociais e empresariais, pero tamén chega co compromiso de denuncia e reivindicación, advirte. Di, nese sentido, que non estarán tutelados por ningunha entidade allea e que serán unha organización independente.
Tras anunciar eses principios fundacionais, o colectivo asegurou este martes que non queren ser unha nova plataforma veciñal. ''Estamos, rotundamente, moi lonxe diso'', asegurou Paco Nieto, que dixo que o novo movemento estará ''fronte a todo o que se opoña ao beneficio da sociedade lucense''.
Defendeu que o movemento está integrado por un grupo de persoas plural e sólido, que quere traballar na procura de consensos a favor de todo o que sexa bo para Lugo.
O uso partidista dos intereses e os asuntos públicos xera o rexeitamento dese movemento, que a partir de setembro irá presentando aos políticos e á sociedade en xeral un groso de ideas a favor de Lugo.
O punto de partida será, en todo caso, a programación de xornadas culturais, con moitas conferencias de figuras de distinto perfil, avanzou o martes Lugo Sempre, que presentou unha web na que se poderá seguir o seu proxecto.
