O Museo Provincial de Lugo abre este venres unha mostra temporal con pezas procedentes das escavacións arqueolóxicas de tres covas de xacementos a provincia -Valdabara (Becerreá), Valiña (Castroverde) e Cova Eirós, en Triacastela.
Este último constitúe un dos xacementos paleolíticos máis importantes do noroeste peninsular e foi declarado ben de interese cultural pola Xunta.
A exposición, situada na zona do museo dedicada a Prehistoria e Arqueoloxía e que coincide coa celebración da III Xornada de Divulgación do Patrimonio Histórico Lucense, prolongarase ata o día 31 de marzo.
A colección que se presenta inclúe materiais orixinais extraídos das covas, pero tamén reproducións e paneis explicativos, entre os que destacan restos do Paleolítico Medio rescatados da Cova Eirós, cunha selección de pezas líticas de cuarzo e cuarcita.
A exposición conta tamén cun texto sobre as tres covas lucenses e outras cavidades calcáreas de Galicia que mostran a importancia do seu estudo como espazos de refuxio para animais e grupos humanos prehistóricos.