O programa que conmemora os vinte anos da declaración da muralla de Lugo como Patrimonio da Humanidade arrincou este venres coa estrea do espectáculo de luz A sombra da muralla ao redor do monumento bimilenario a cargo da artista Luisa Álvarez.
As portas de Bispo Aguirre, San Pedro, Falsa, Miñá, Nova e Santiago albergan un sistema de luces vermellas, azuis e amarelas que invitan aos lucenses a fotografar a sombra producida polo seu corpo sobre os muros da muralla, a modo de pegada cromática. O espectáculo estará activo ata o luns, en horario de 18.30 horas ás 22.30 horas.
A iniciativa tivo unha excelente acollida por parte dos veciños e durante a primeira xornada desta experiencia lumínica foron moitos os que quixeron inmortalizar esta conmemoración cunha instantánea a cargo dalgún coñecido ou coa axuda dos membros da organización, que antes de sacar a fotografía lle explicaban aos interesados o porqué deste evento.
CONCERTOS. A área de cultura do Concello organiza ademais tres concertos onde actuarán diferentes formacións corais e a Filharmónica de Lugo que complementan o aniversario.
A coral do Hospital, Solo Voces e Cantar Delas ofrecerán un concerto no auditorio municipal Gustavo Freire o vindeiro luns ás 20.30 horas. Baixo o nome 20 pezas para a muralla, as corais realizarán unha homenaxe á muralla e interpretarán unha canción por cada ano da nova vida da mesma como patrimonio da humanidade.
Ademais, a Banda Filharmónica de Lugo ofrecerá dous pases dun mesmo concerto en homenaxe á muralla, o 5 de decembro, ás 18.00 e ás 20.00 horas.
