Seis mozas fixeron xa a reserva de matrícula no novo colexio diocesano San Lorenzo, que ofrecerá estudos de Eso, BAC e Formación Profesional —en principio, un ciclo de adestrador de baloncesto e outro da rama sociosanitaria—, no edificio do Seminario. A partir do próximo curso, as centenarias instalacións do Seminario —fundado fai 500 anos— acollerán, por primeira vez, a mulleres dado que o novo centro educativo será mixto.
Ademais destas seis reservas de matrícula, tamén se recibiron, a través da web do colexio, máis de 50 peticións de información sobre o proceso de inscrición, que se realizará o mes que vén. A páxina, www.colegiodiocesanosanlorenzo.org ofrece unha ampla información sobre este proxecto educativo, que se porá en marcha en setembro.
O centro recupera o nome de San Lorenzo, co que se fundou no ano 1598 e na Praza Maior, onde están agora os Franciscanos. Tres séculos despois, o Seminario trasladaríase ao edificio actual, construído a finais do século XIX. O Seminario de Lugo foi o segundo centro educativo máis antigo de Galicia, despois do de Mondoñedo, e o máis veterano da capital lucense.
SAN JUAN DE Ávila. Por outra banda, onte celebrouse o Día do Seminario, coincidindo coa festa de San Juan de Ávila, patrón do clero secular. Na programación de actos, incluíuse unha charla do reitor do Seminario, David Varela, sobre o novo colexio diocesano, que tivo lugar no Salón Rexio do Círculo das Artes a partir das once. Na conferencia, deuse unha ampla información sobre o proxecto educativo, sobre o que hai un elevado interese.
Unha hora despois, celebrouse unha eucaristía na catedral, presidida polo bispo, Afonso Carrasco Rouco.
Houbo tamén un recordo, nesta xornada, para aqueles curas que celebran este ano as súas vodas de ouro sacerdotais. Trátase de Ángel Eiriz Mouriz, José Gómez Vázquez, Manuel Fernández Fernández, Mauro Negro Fernández e Juan Pena González.
Así mesmo, celebrou tamén as vodas de prata sacerdotais Ramón Álvarez Varela.
Debido á pandemia, este ano non se organizou o tradicional xantar de homenaxe aos sacerdotes que celebran as súas vodas de ouro e prata sacerdotais, como viña sucedendo en edicións anteriores, a excepción do ano que pasado que tampouco se celebrou debido ao covid.
