O concepto de movida nocturna na vila de Sarria cambiou nos últimos anos. A zona coñecida como "de viños" situada na Rúa Rías Baixas, reunía a máis de 35 locais dedicados a este tipo de lecer fai só uns seis ou sete anos. Con todo, factores como a crise xeraron un descenso na presenza de mozos, o que provocou que varios locais tivesen que pechar as súas portas. Na actualidade, a movida sarriá trasladouse á zona da rúa Calvo Sotelo.
"As tendencias van cambiando, a xente quere innovar e abúrrese dos mesmos sitios. Eu trasladei o meu local hai sete meses á zona de Calvo Sotelo, fun un dos últimos e estou moi contento. Agora abro ás once da noite e pecho antes pero teño máis xente e consomen máis", afirma o dono dun local de hostalería.
Por outra banda, os hábitos de consumo tamén cambiaron. "A xente nova prefire pasar dos cubalibres e as copas e optan por beber chupitos que son máis baratos. Mentres que os adultos elixen saír noutras cidades. Necesitamos xente que quede aquí", sinala outro hostaleiro.
UNHA ASOCIACIÓN. Debido á situación que lles azoutaba, os responsables dos pubs e discotecas que funcionan en Sarria uniron esforzos para recuperar o esplendor da movida na localidade. Por iso, crearon o ano pasado unha asociación de empresarios chamada Sarria Mola na cal participan 12 pubs e 2 discotecas.
Desde a asociación, leváronse a cabo acciones para recuperar o sector. Unha delas foi o ano pasado cando puxeron en marcha o Noitebús coa colaboración do Concello para atraer a mozos de Lugo e Monforte á vila. Os autocares eran financiados polos hostaleiros e os usuarios, quen abonaban dous euros por traxecto de ida e volta. Tras uns meses en funcionamento finalmente tivérono que retirar por falta de persoal.
Tamén se instalaron paneis de promoción da movida sarriá noutras localidades situadas nun radio duns 50 quilómetros. Desde a asociación realizaron o ano pasado unha festa de Entroido na discoteca Litmar, onde lograron reunir a moitas persoas. "Foi un éxito total, queremos repetir este ano", comenta un membro da asociación.
Por outra banda, os bares con terrazas son outro aliado nos tempos que corren. Tomarse plácidamente un café, un refresco ou unha caña nestes espazos dos bares púxose de moda na vila sarriá.
MÁS TERRAZAS. Cada ano, o número de terrazas vai en aumento, ofrecendo aos clientes algo diferente. "Sempre funcionaron. A pesar da crise, Sarria está a ser un referente para moitos establecementos na zona do interior. Hai variación de xéneros e hai locais moi dinámicos", asegura un hostaleiro.
Desde a asociación negociarán futuros proxectos para seguir atraendo aos mozos a participar na movida sarriá.
