Axentes da Policía Local de Lugo imputaron como investigado por un suposto delito contra a seguridade viaria a un motociclista que apenas podía manterse en pé cando lle deron o alto, dado que deu unha taxa positiva no control de alcoholemia máis de catro veces superior á permitida.
Segundo informou a Policía Local, os feitos sucederon a pasada madrugada, cando a sala operativa do 092 recibiu chamadas de veciños que se queixaban polos ruídos dunha motocicleta que estaba realizando aceleróns por varias rúas da cidade.
Unha patrulla do Grupo Operativo Nocturno da Policía Local de Lugo localizou ao motociclista cando circulaba pola rúa Antonio Rosón.
Cando lle deron o alto, os axentes decatáronse de inmediato de que o condutor bebera, porque apenas podía manterse en pé.
Ao sometelo ás probas de alcoholemia, deu un resultado positivo de 1,07 miligramos de alcol por litro de aire expirado, máis de catro veces a taxa permitida pola lei.
Ademais, os axentes comprobaron que a motocicleta tiña caducada a ITV, polo que foi inmobilizada.
Foi imputado como investigado por un delito contra a seguridade viaria pola modalidade de xuízo rápido.
