A presidenta de Vox en Madrid, Rocío Monasterio, pediu este martes ao presidente da Xunta e candidato do PP á reelección, Alberto Núñez Feijóo, que deixe as eleccións do 12 de xullo "nun segundo plano" e dea "prioridade á xestión sanitaria".
En declaracións aos medios durante a súa visita a Lugo para arroupar á cabeza de lista do partido por esta provincia, Sonia Teijeiro, Monasterio mostrouse "preocupada por todos os lucenses e especialmente pola Mariña", comarca que permanecerá pechada ata o venres debido a un rebrote de coronavirus que suma máis dun centenar de casos positivos.
"Esperemos que o señor Feijóo estea a dar prioridade á xestión sanitaria e que non estea centrado demasiado nas eleccións nin esqueza a saúde dos galegos", engadiu. Neste contexto, a líder de Vox en Madrid manifestou que non lle gustaría ver como o luns 13 de xullo, o día seguinte ás eleccións, "se anunciasen máis brotes" na comunidade galega.
A DESPOBOACIÓN, "TEMA FUNDAMENTAL". Así mesmo, Rocío Monasterio abordou en Lugo un "tema fundamental do que Vox sempre está a falar", que é "o despoboamento". Explicou que un impulso á natalidade "só se consegue dotando de medios e infraestruturas a todos os lugares que teñen difícil manter a súa poboación".
De igual modo, sinalou a importancia das medidas "de apoio á familia", do que se serviu para criticar que Feijóo non só "non fai" políticas nesta liña, senón que ademais "entregouse" a unha educación que ten como prioridade "a ideoloxía que fomenta o nacionalismo e o adoutrinamento nas aulas".
TEN "ESPERANZA" PARA O 12-X. Preguntada sobre as perspectivas de Vox a entrar no Parlamento galego, cando as enquisas publicadas en medios parecen xogar na súa contra, Monasterio dixo ter "a esperanza de ser a voz" que permita que o actual presidente da Xunta "non sexa o cacique único de Galicia".
"É moi san que para a democracia haxa un partido como Vox dicindo as verdades. Seremos a voz de moitos galegos que están cansados de que só se escoite a voz de Feijóo", finalizou, non sen antes denunciar a "violencia" que sofre a súa formación nos sucesivos actos de campaña para as eleccións vascas e galegas.
Desde Jupol, sindicato maioritario da Policía Nacional, trasladaron a súa desacuaerdo coa subida salarial anunciada nos últimos días polo Goberno, que, ao seu xuízo, non supón unha equiparación salarial coas policías autonómicas.
Tamén expuxeron a necesidade de incrementar o número de efectivos de Policía Nacional en toda a provincia.
