A Mosqueira estará cortada ao tráfico na mañá do domingo 22, coincidindo co Día Europeo sen Coches. A partir das 11.30 horas, a praza acollerá actividades infantís a cargo do Club Ciclista Cidade de Lugo (será necesario levar bicicleta e casco). Ademais, ás 13.00 horas dará comezo unha sesión vermú co grupo lucense Wicked World, que renderá tributo aos grupos de rock da década dos 70, 80 e 90.
Segundo explicou o tenente de alcalde, Rubén Arroxo, a área de Mobilidade pretende deste xeito realizar unha "demostración da futura peonalización da Mosqueira". Como nos últimos anos, o bus urbano será gratuíto.
Arroxo recalcou que se trata "dunha oportunidade para desfrutar dun Lugo onde non se precise ter a muralla rodeada por vehículos”. Nese sentido, incidiu en que ""o recinto interior da Muralla é a zona monumental máis importante da cidade", xa que conta con valiosos elementos distinguidos como Patrimonio dá Humanidade, e por iso temos a responsabilidade de traballar para que a cidade e o seu casco histórico, ademais de ser un atractivo turístico, continúe sendo un espazo habitado no que lucenses e visitantes conflúan".
