A provincia de Lugo suma este mércores dúas novas mortes de persoas que foran diagnosticadas de coronavirus, co que son xa 253 as vítimas do covid na provincia desde o inicio da pandemia, aínda que o Sergas contabiliza 245 ao non incluír os decesos dalgúns lucenses que se produciron noutras áreas sanitarias. Trátase dunha muller de 92 anos que faleceu no seu domicilio de Carballedo e un home de 89 anos que perdeu a vida no Hula e que procedía da residencia de maiores das Gándaras.
Segundo informou a Consellería de Sanidade a última hora deste mércores, os dous defuntos presentaban patoloxías previas. Os seus óbitos elevan a 2.612 o saldo de vítimas do coronavirus en Galicia desde o comezo da crise sanitaria.
No caso da residencia das Gándaras é a sexta vítima mortal, logo da a comunicada o pasado venres, cando faleceu dun home de 88 anos deste centro. Previamente pereceran xa un home de 79 anos e dúas mulleres, unha de 87 e outra de 93 anos, no xeriátrico, e un home de 64 anos que feneceu no Hula, pero que era tamén residente do centro de maiores.
