Montevideo e Bolaño Rivadeneira serán peonís e San Fernando, bidireccional

O tráfico no interior do recinto amurallado verase limitado exclusivamente a residentes, vehículos de repartición e usuarios dos aparcadoiros unha vez se peonalicen dúas novas rúas, a Rúa Montevideo e Bolaño Rivadeneira. A medida podería ser implantada no ano 2021, dado que no orzamento do próximo ano non hai partidas reservadas para este fin e a execución deste proxecto farase coincidir coa creación dunha rotonda para axilizar o tráfico na Ronda da Muralla, á altura da porta de San Fernando, un acceso ao centro que ademais pasará a ser bidireccional para permitir a entrada de vehículos á Praza de Ferrol.

O tenente de alcalde, Rubén Arroxo, e o edil de infraestruturas, Alexandre Penas, explicaron estas propostas tras presentar en rolda de prensa os resultados do estudo de tráfico encargado para analizar o fluxo de vehículos e peóns fronte á porta de San Fernando, un dos tramos da Ronda onde se rexistra máis volume de circulación.

Arroxo explicou que a idea do goberno local é avanzar na peonalización do centro histórico, de modo que unha vez se execute ao longo do próximo ano o peche ao tráfico de Quiroga Ballesteros, o seguinte paso será facer o mesmo nas rúas Montevideo e Bolaño Ribadeneira, onde só se permitirá o paso de vehículos de residentes, de repartición ou aos que accedan ao aparcadoiro de detrás do Hospital Nosa Señora dos Ollos Grandes, aínda que manteranse as paradas de bus "para non deixar sen servizo de transporte urbano ao centro histórico".

Arroxo: "As paradas de bus urbano manteranse coa peonalización para non deixar ao centro histórico sen transporte urbano"

Ademais, os usuarios do aparcadoiro público da Praza de Ferrol poderán entrar e saír pola porta de San Fernando, que pasará a ser bidireccional unha vez se execute a rotonda que o estudo de tráfico encargado polo Concello considera que dará fluidez ao tráfico da Ronda na confluencia coa Avenida da Coruña.

Segundo as conclusións do informe de mobilidade, que analizou os fluxos de tráfico neste punto da cidade, a glorieta permitiría aforrar a metade de tempo de espera dos vehículos nos semáforos, que se manterán aínda que só para dar paso aos peóns. Ademais, os técnicos consideran que se reducirán as velocidades, xa que agora os condutores terán que minorar a marcha ao chegar á rotonda aínda que teñan o semáforo en verde.

PASOS DE PEÓNS. A alternativa de glorieta elixida polo estudo contempla trasladar uns metros dous dos actuais pasos de peóns, o situado na Ronda unha vez pasado San Fernando, que irá uns metros máis adiante, e o existente na Avenida da Coruña, enfronte da porta da muralla, que tamén será colocado máis atrás. Con este cambio preténdese evitar que cando o semáforo estea en verde para os peóns se rexistren colas de vehículos que colapsen o tráfico na rotonda. Arroxo recoñeceu que unha das obxeccións que se expoñen á hora de reordenar a circulación neste punto da Ronda é o desprazamento do paso de peóns, porque obrigará aos transeúntes a andar máis para cruzar. De todos os xeitos, o tenente de alcalde explica que se manterá na súa actual localización o paso que está antes da porta da muralla, cuxo semáforo estará ademais coordinado co de San Fernando para axilizar o tránsito peonil.

CARRIL BICI. A alternativa de ordenación do tráfico elixida para esta intersección tamén contempla a creación dun primeiro tramo de carril bici na Ronda, que poderá usar usado a contradirección polos ciclistas, aínda que de momento só abarcará desde a porta de San Fernando ata a sede da Xunta. Ademais, a futura configuración deste cruzamento incorpora melloras na contorna mediante un incremento da zona verde que rodea á muralla.

Por outra banda, Arroxo non quixo cuantificar o custo da reordenación do tráfico nesta zona, dado que dependerá do tipo de rotonda que se cre. A este proxecto tamén habería que unir o custo de peonalizar as dúas rúas do centro, ao ser proxectos vinculados.