O anfiteatro do campus arrastra anos de abandono, pero nos actuais tempos de pandemia ese espazo poderíase recuperar tanto para organizar actividades culturais como deportivas. Esa é a proposta que puxo este mércores sobre a mesa a concelleira do PP Beatriz Vázquez.
A edil remarcou que o ese auditorio ofrece 2.500 prazas ao aire libre e dixo que a remodelación desa infraestrutura permitiría gañar en seguridade en tempos de covid. Aproveitar ese espazo, sostivo, permitiría ofrecer na primavera e verán unha programación cultural estable, nunha contorna atractiva e seguro á vez.
O anfiteatro, construído no seu día pola Deputación, sofre as consecuencias de anos de abandono e Vázquez chegou a cualificar o seu estado "de ruinoso", con bancadas e paredes pintadas, restos de botellóns e pedras de granito arrincadas e rebentadas, ademais de maleza e lixo, dixo.
Con todo, o espazo pódese aproveitar e a edil popular dixo que lanza agora a proposta de acondicionar ese auditorio porque se se actúa xa o espazo podería estar en óptimas condicións de uso cando chegue o bo tempo. Recordou que a obra foi promovida no seu día polo PP e que a infraestrutura se acabou no ano 2000. Foi, na súa opinión, abandonada polos sucesivos gobernos de PSOE e BNG.
A pesar da deterioración que acumula, o espazo é viable, defendeu a concelleira do PP, que recordou que ese anfiteatro ten unha enorme capacidade, xa que pode albergar a 2.500 espectadores e conta cun escenario de 800 metros cadrados.
As condicións do espazo permiten unha gran variedade de usos, empezando por actividades culturais, pero que poderían estenderse tamén a exhibicións deportivas ou incluso coreografías das escolas de baile da cidade.
A edil do PP sostivo que o anfiteatro se atopa nunha zona privilexiada, no campus e moi preto do río, e recordou que se gastou un millón de euros na súa construción.
Defendeu que é un bo momento para reactivar o uso público dese espazo e pediu que o Concello pida á Deputación e á Universidade colaboración para reactivar ese auditorio, construído no seu día a través dunha escola taller.