A Asociación Provincial de Empresarios de Hostalería e Turismo de Lugo (Apehl) celebrará este sábado, por segundo ano consecutivo, o congreso gastronómico e cultural E para comer, Lugo no Camiño, unha xornada sobre a cultura gastronómica nas rutas xacobeas ao seu paso pola provincia de Lugo.
Esta iniciativa, que forma parte do programa O Teu Xacobeo, desenvolverase nas instalacións do Museo Interactivo da Historia de Lugo (MIHL), na propia capital lucense.
O programa do congreso inclúe unha charla sobre a cultura do viño nos Camiños de Santiago que atravesan a provincia, que será impartida por Xoan Cannas, director do Instituto Galego do Viño; así como unha demostración do barista José Manuel Portela –Café cremoso en harmonía cos Camiños–, responsable de formación de Cafés Candeas.
Ademais, contempla varias demostracións de cociña con produtos de proximidade a cargo de Javier Estévez, Estrela Michelín en 2019 polo seu labor en A Tasquería de Javi Estévez, en 2020 e en 2021.
Os organizadores recordan que as súas propostas culinarias suscitaron o interese de medios como The New York Times e de programas de televisión como Informe Semanal, Torres na cociña, MasterChef, Karlos Arguiñano na túa cociña, Andrew Zimmern ou a sección de George Foreman en Better late than never.
O programa tamén contempla unha charla co piloto Eduardo Iglesias baixo o título ...E para comer, Lugo no Dakar 2021. Ademais, os asistentes poderán ver a moto coa que disputou a proba deportiva este ano. En paralelo á celebración do Congreso realizarase (de 11:00 a 13:00 hora) un taller para nenos de entre 6 e 12 anos.