A alcaldesa de Lugo, Lara Méndez, confirmou que o Concello segue realizando xestións para "repor a legalidade" na parcela do Garañón, pero tamén recoñeceu que se trata dun "proceso complexo" e que, polo menos de momento, non hai data para derrubar as polémicas torres.
A urbanización do Garañón e a construción das dúas torres –cuxo esqueleto pode verse á beira do parque Rosalía de Castro– provocou no seu momento unha importante polémica e mobilización social na cidade de Lugo, para acabar nun proceso xudicial no que chegaron a estar imputados o expresidente da Deputación de Lugo, José Ramón Gómez Besteiro, e o exalcalde da cidade, José López Orozco.
O chamado Caso Garañón –instruído pola xuíza Pilar de Lara– foi recentemente arquivado pola Audiencia Provincial de Lugo, ao non percibir os maxistrados indicios de delito por parte das persoas investigadas, aínda que sobre as citadas torres pesa unha sentenza xudicial que obriga á reposición da legalidade e, consecuentemente, á súa derriba.
Con respecto á xestión para cumprir esas sentenzas, a alcaldesa dixo este xoves que "segue o seu proceso".
"O obxectivo do goberno local é derrubar O Garañón e incluso intentar reconverter a parcela para que siga sendo unha zona verde, coa finalidade de darlle continuidade ao parque Rosalía de Castro e potenciar a unión do río Miño coa cidade", aclarou, á vez que recoñecía que "non podemos falar de momento de datas, pero si de obxectivos"
O obxectivo do Concello de Lugo é, precisamente, "facer o que din as sentenzas, repor a legalidade e derrubar O Garañón".
En todo caso, recordou que "o titular entrou en concurso de acredores", de modo que o Concello está "a falar con tres interlocutores" e é un "proceso complexo", no que hai que "ser cautos".
A rexedora local fixo estas declaracións a preguntas dos xornalistas, logo de presentar un plan de mellora para o parque Rosalía de Castro e de anunciar que xa está a preparar a programación para celebrar este ano o centenario deste Ben de Interese Cultural.
