A alcaldesa de Lugo, Lara Méndez, asinou este mércores as bases do Plan Reanima Lugo, que inxectará cinco millóns de euros na economía local, a través de axudas directas para autónomos, microempresas, pemes e familias, coa finalidade de achegarlles liquidez para que poidan facer fronte aos gastos e protexer os postos de traballo mentres dure a urxencia sanitaria.
A rexedora local precisou que, por parte do goberno local, “intentouse reducir nestas bases a burocracia, para que sexa máis fácil a tramitación” das propias axudas, de modo que “sexan efectivas o máis rápido posible, tendo en conta a situación delicada na que está a economía local”, como consecuencia “desta crise sanitaria”.
Precisou que as bases poderán consultarse durante esta Semana Santa na web do Concello de Lugo e a principios da próxima semana serán publicadas no Boletín Oficial da Provincia (BOP), momento a partir do cal quedará aberto un prazo de 20 días para presentar as solicitudes.
Ademais, o Concello de Lugo habilitará canles informativas para que as persoas que decidan solicitar esas axudas consulten as súas dúbidas.
Outro millón de euros irá destinado á conciliación da vida laboral e familiar
Este plan municipal contempla axudas fixas de 1.200 euros para autónomos e empresas que tiveron que pechar como consecuencia dos decretos do Goberno con medidas para frear a propagación do coronavirus.
Ademais, aqueles autónomos ou pemes que viron reducida a súa facturación nun 75% como consecuencia do estado de alarma poderán acceder a axudas fixas de 750 euros.
En canto ás empresas, recibirán entre 450 e 600 euros por cada empregado se non recorren para capear esta situación a expedientes temporais de regulación de emprego, mentres que aquelas que boten man dun Erte percibirán axudas sempre que os traballadores cobren o 100% da base reguladora e non só o 70%, que é o que achega o estado.
Ademais, outro millón de euros irá destinado á conciliación da vida laboral e familiar.
