A alcaldesa de Lugo, Lara Méndez, presentou este mércores no Senado o modelo de cidade sostible de futuro no marco das xornadas 'Cidades españolas ante o reto da neutralidade climática. Presentación de CITIES 2030'.
Lugo foi unha das 12 cidades elixidas para participar nesta reflexión sobre o futuro verde das urbes españolas, nunha cita na que participou a ministra de Transportes, Mobilidade e Axenda Urbana, Raquel Sánchez.
Así, Méndez destaca que: "A recuperación económica de Lugo virá da man da sustentabilidade acorde co modelo de cidade no que estamos a traballar".
Deste xeito, expuxo medidas para conseguir un tecido urbano máis resiliente ante o cambio climático e para a diversificación industrial. Entre outras cuestións, puxo en valor a iniciativa do primeiro barrio ecolóxico de España.
