Méndez di que Feijóo rectifica ao aceptar que se fale sobre o cuartel

A alcaldesa de Lugo, Lara Méndez, saíu este mércores ao paso do balance que o día anterior fixo o presidente da Xunta e candidato do PPdeG, Alberto Núñez Feijóo, sobre os investimentos do Goberno autonómico en Lugo. De toda a intervención, Méndez só destacou un aspecto positivo: "A medio rectificación ao seu delegado territorial José Manuel Balseiro, que deixa entrever respecto ao museo da romanización de Galicia para que a súa sede sexa no edificio comprometido, o cuartel de San Fernando, como así é o desexo de toda a sociedade lucense".

Referíase deste xeito ás declaracións de Núñez Feijóo o día anterior, nas que, tras mostrar a súa estrañeza pola mobilización cidadá en favor do museo de romanización en lugar do parador de turismo que propón agora a Xunta, recoñeceu que se é reelixido sentará a negociar co Concello, propietario do cuartel, para "acordar" un servizo que "traia xente, riqueza e investimento a Lugo".

"Se é así", respondeu este mércores a alcaldesa, "ten a nosa total dispoñibilidade para sentar a reconducir este tema, porque supoño que se a Xunta achega case 700.000 euros para rehabilitar un BIC da igrexa, como a de San Pedro, ben pode investir nun BIC de todos".

Foi, en calquera caso, o único aspecto minimamente positivo que Lara Méndez atopou no balance que Feijóo realizou sobre os investimentos en Lugo nos seus once anos á fronte da Xunta. Unha réplica na que se axudou da hemeroteca para remarcar o que presentou como promesas incumpridas para remarcar que, "se Feijóo houbera cumprido os seus compromisos con Lugo, tería presentado o seu balance xunto as obras e non nun café".

Especialmente doída mostrouse coa afirmación do candidato do PP de que se José López Orozco fose o alcalde, o auditorio xa estaría aberto. Exhibindo unha noticia do 2004 co titular "Orozco pide a Fraga que sexa o valedor de Lugo para conseguir o novo auditorio", Méndez recordou que o conselleiro ante o que Orozco pedía a Fraga que mediase era o propio Feijóo, "que hai 16 anos xa estaba a bloquear os temas de Lugo".

O reproche da alcaldesa incluíu a estación intermodal, os colexios, a rehabilitación da Tinería ou a Ronda Este 

Comezou despois, sempre apoiada por noticias de xornais publicadas nos últimos anos, unha réplica punto por punto ao repaso que o día anterior realizara Feijóo dos investimentos do goberno autonómico en Lugo. Ás prazas de garderías na cidade que presentou, Méndez respondeu que das sete garderías catro son municipais, dúas da Xunta e a outra de financiamento conxunto e construído en terreos municipais por Amancio Ortega, a quen presentou como "substituto da Xunta en Lugo". Ás súas doazóns débense tamén, dixo a alcaldesa, a unidade de radioterapia do Hula ou a nova residencia da terceira idade que se anunciou despois de que non se crease nin unha soa nova praza na cidade desde hai 42 anos.

Méndez tamén ironizou co feito de que Feijóo se presentara como "impulsor" do servizo de Hemodinámica 24 horas, sen querer recordar, dixo, que se viu obrigado a darlle luz verde debido á mobilización social, do mesmo xeito que sucedeu cos terreos do antigo hospital Xeral e o barrio da Residencia, onde os veciños estiveron varios anos mobilizándose todos os xoves: "Algunhas desas veciñas, como Amparo, que foi unha das que iniciaron as mobilizacións en 2011, xa non poderán velas obras", lamentouse.

O reproche da alcaldesa continuou coa estación intermodal, os colexios, a rehabilitación da Tinería ou a Ronda Este, para concluír que "merecemos un presidente de Galicia que cumpra coa palabra dada á veciñanza e que pague a débeda, xa histórica, cos e coas lucenses".