O delegado do Goberno en Galicia, Javier Losada, realizou este venres a súa primeira visita oficial ao Concello de Lugo e mantivo unha reunión de traballo coa alcaldesa, Lara Méndez, e coa subdelegada do Goberno en Lugo, Isabel Rodríguez, para planificar as "reunións que ao longo das próximas semanas" manterá a rexedora local co ministro de Fomento, José Luis Ábalos, para falar das infraestruturas pendentes na cidade.
"De momento non hai data, hai que deixarlles un tempo razoable para que se asenten e coñezan os proxectos, para que realmente sexan reunións frutíferas e haxa unha interlocución fluída", dixo a alcaldesa.
Os LUCENSES, "CANSADOS". Confía, en todo caso, en que eses encontros se produzan "o máis axiña posible" e, de feito, confirmou que xa se iniciaron os contactos para as reunións tanto co propio ministro –de Fomento, José Luis Ábalos– como coa presidenta de Adif –Isabel Pardo de Vera–".
Recordou que os compromisos se materializan nos orzamentos e no BOE", porque os lucenses xa están "cansados de boas palabras", de modo que tamén confía en que as reunións previstas sirvan para que "todos saibamos cal é o punto de partida e o horizonte ao que queremos chegar".
En canto á reunión con Losada, dixo que foi "unha conversación moi fluída e moi fácil porque xa era coñecedor das necesidades" que ten Lugo no que se refire ás competencias do Goberno de España e agradeceulle ao delegado "o compromiso de vir cos deberes feitos".
Lara Méndez cualificou "esta primeira toma de contacto como frutífera", dado que o delegado do Goberno converterase "no nexo" da cidade co executivo que preside Pedro Sánchez, para reclamar infraestruturas pendentes como a "AVE, a intermodal, a rotonda de acceso á cidade desde a Nacional VIN a través de Afonso X ou as comunicacións con Ourense e con Santiago", para que "Lugo non quede illado nin de Galicia nin da meseta".
LUGO-MADRID. Losada dixo que Lara Méndez é "unha gran alcaldesa" e dixo que a súa viaxe a Lugo foi para trasladarlle "o apoio" do Goberno de España a eses "proxectos de conexión intergalaica e co resto de España".
"Hai un compromiso do Goberno de España, do presidente Pedro Sánchez, para levar a Alta Velocidade nos tempos previstos; para conseguir que a conexión con Santiago por autovía termine tamén nos tempos previstos; para darlle un impulso á conexión con Ourense; para facer da seguridade e a loita contra a violencia de xénero sexa un eixo fundamental nesta cidade", dixo o delegado.
Asegurou que "hai un compromiso de proximidade" do Goberno de España "con Lugo", engadiu Losada, quen confirmou que a reunión deste venres tamén serviu para "ir preparando as reunións que ao longo das próximas semanas a alcaldesa terá cos ministerios, fundamentalmente con Fomento, para que esas actuacións comprometidas, pero nunca feitas" polo anterior executivo, sexan "unha realidade".
"Os lucenses necesítanas e nós, desde a responsabilidade, dicindo sempre a verdade sobre cando se poden facer as cousas, os prazos e as posibilidades, ímolas a facer, porque ese é o noso compromiso", resolveu.
