A alcaldesa de Lugo, Lara Méndez, reforza a súa demanda de que o vello cuartel de San Fernando acolla o prometido museo da romanización porque considera que este se convertería nun "referente a nivel nacional". Este xoves recordaba que no seu día se realizaron 16 catas neste inmoble militar, polo que propón que se se musealizan eses restos achados, xunto ao centro de investigación, "lle daría un plus que ningún outro museo ao mellor pode ter".
Lara Méndez realizou estas declaracións con motivo da segunda xornada de portas abertas celebrada este xoves no cuartel de San Fernando, xa que, ao seu xuízo, a que tivo lugar o pasado luns "quedou curta" polo interese espertado na cidadanía.
A rexedora local, que volveu esixir que a Xunta retome o proxecto de 2012 cunha partida de 10 millóns de euros, reiterou que este inmoble precisa "unha inmediata actuación" porque pola contra, á súa entender, córrese "o risco de que sufra deterioracións, nalgún caso irreparables".
RESPOSTA. A Consellería de Cultura e Turismo cre que o cuartel de San Fernando ten "un enorme potencial" e é partidaria, como xa propuxo o delegado territorial da Xunta en Lugo, José Manuel Balseiro, de avaliar "con serenidade os diferentes usos que se poidan considerar, sempre desde unha perspectiva integral".
A Xunta comprometeuse hai anos a rehabilitar o vello cuartel para crear nel o centro galego da romanización, pero onte, preguntada por se mantén este proxecto na súa axenda, limitouse a indicar que está atenta "aos diferentes plantexamentos".
O Executivo galego meteu o proxecto no caixón cando chegou a crise e nada parece indicar que o vaia a retomar, polo menos a curto prazo. Xa en decembro pasado, o conselleiro de Cultura, Román Rodríguez, afirmaba nunha entrevista neste xornal que non existe unha demanda social "unánime e clara" sobre esta infraestrutura e aludía a que Lugo ten un museo, o MIHL, "infrautilizado".
"Para min é un proxecto co que non hai que obsesionarse, pero que tampouco débese descartar. Hai que ver se se vai xerando un consenso arredor desta proposta e acaba por, quizais a medio prazo, resultar interesante. En todo caso debe ser un proxecto compartido polos diferentes axentes", afirmaba o conselleiro hai un ano.
Recentemente creouse unha plataforma cidadá para reclamar esta infraestrutura, que o goberno local segue demandando. Ata agora, o PP local tamén a defendía, pero o seu actual portavoz municipal, Ramón Carballo, cre que é necesario volver analizar cal sería o uso máis idóneo para o cuartel e se o centro da romanización podería crearse nalgunha infraestrutura xa existente.
