A entrada do BNG nun goberno municipal de coalición co PSOE en Lugo e quizais tamén con Lugonovo non se coñecerá polo menos ata a semana que vén, xa que os nacionalistas queren convocar unha asemblea aberta para escoitar a opinión de militantes e simpatizantes. Con todo, tras a reunión celebrada este martes pola tarde entre as comisións negociadores de PSOE e BNG para buscar un pacto de goberno, os socialistas mostráronse confiados en que se logre un acordo, á vez que consideraron asumibles as demandas expostas polos nacionalistas.
Pola mañá, Méndez —que seguiu coa súa rolda de visitas ás dependencias municipais— referiuse ao contacto do día anterior con Lugonovo, no que, segundo a nova alcaldesa de Lugo, atopáronse "principios de acordo". Pero, como recordou a rexedora, a formación de Santiago Fernández Rocha é "asemblearia", polo que a decisión de formar ou non parte do goberno local queda pendente, como ocorre co BNG, do que decidan os militantes. Con todo, Méndez confía en ter pechado o goberno local antes de fin de mes.
En canto ao BNG, os seus dous concelleiros consideraron prioritario acometer unha reforma dos servizos sociais municipais, "que se atopan colapsados". Tanto Rubén Arroxo como Maite Ferreiro (aos que acompañaba o responsable local, Alexandre Penas) insistiron en desbloquear determinados asuntos que López Orozco, o anterior alcalde, "empeñouse en non facer porque eran propostas do BNG, como a zona de baño fluvial e os hortos urbanos".
