A alcaldesa de Lugo, Lara Méndez, confirmou que, se a empresa concesionaria do aparcadoiro subterráneo situado na Praza de Viana do Castelo non fai efectiva a cantidade correspondente ao canon de explotación dos últimos oito anos, o asunto pode terminar na Fiscalía.
A concesionaria non fixo efectivo o pago do canon correspondente aos últimos oito anos, segundo denunciou o grupo municipal do Partido Popular, motivo polo que o Concello de Lugo abriulle un expediente que, se non hai outra solución, acabará "no xulgado".
"Os técnicos municipais están a avaliar a situación", dixo Lara Méndez, quen recoñeceu que o Concello prefire sempre liquidar os problemas pola vía do "diálogo".
De feito, os técnicos do Concello de Lugo que se ocupan dese expediente puxéronse en contacto coa concesionaria para reclamar que "pague a débeda". "Se chegamos a un acordo, daremos por pechado o expediente", dixo Méndez, se non é así este asunto acabará "no xulgado" ou, directamente, "en Fiscalía".
Para o Partido Popular estes oito anos de falta de pagamento por parte da concesionaria dun servizo público é un exemplo claro do descontrol que reina no Concello de Lugo como consecuencia da "incompetencia" do goberno local que preside Lara Méndez.
