O Administrador de Infraestruturas Ferroviarias (Adif) anunciou a licitación dun contrato para a eliminación de catro pasos sobre a vía do tren situados no termo municipal de Lugo. A estas obras destinará 3.074.517 euros (Iva incluído).
Os traballos que se van a levar a cabo están definidos en tres proxectos construtivos diferentes. Un deles é o relativo ao paso máis próximo á cidade, o situado en Castelo de Abaixo. Construirase un paso inferior no punto quilométrico 430/040, cun novo camiño de acceso a través de dúas sendas existentes, con orixe no núcleo de Castelo de Abaixo e fin en Penoucos. O paso terá 8 metros de ancho e 5,14 de alto e as súas características permitirán unha posible ampliación a dobre vía pola marxe dereita en sentido Lugo.
Outro dos proxectos mellorará a seguridade un pouco antes, en Barbaín e Bosende, entre os puntos quilométricos 428/980 e 429,811. Agora hai dous pasos a nivel e a solución que se propón é un único paso inferior nun punto intermedio. Proxéctase un novo camiño que conectará o paso cos camiños xa existentes a través de dúas sendas de enlace e outro de acceso a unha leira.
A nova vía terá 8 metros de ancho e o seu trazado está condicionado polo corredor reservado para a ampliación da Rolda Este, unha circunvalación que agora acaba na estrada da Fonsagrada e que a Xunta ten pendente de continuar desde ese lugar ata A Tolda.
O paso inferior terá 8 metros de ancho e 5,14 de alto e tamén quedará preparado para un posible ampliación a dobre vía pola marxe dereita en sentido Lugo.
Para rematar, o terceiro proxecto consiste na construción dunha nova vía cara ao paso inferior existente no punto quilométrico 430/587, a uns 180 metros de distancia. Terá unha anchura de tres metros, igual á do camiño que conduce actualmente ata ese lugar. El firme será de formigón en masa sobre unha capa de zahorra artificial, características similares ao camiño que existe agora.
A supresión e mellora dos pasos na liña ferroviaria permite mellorar a seguridade pero é tamén importante para poder aumentar a velocidade á que poden circular os convois.
A actuación anunciada agora supón un paso máis no plan deseñado en 2018 solucionar o risco que supuñan 36 pasos sobre a liña férrea no tramo entre Ourense e Lugo, catorce deles no municipio. O maior risco pervive en zonas rurais, xa que hai puntos de cruzamento nas parroquias que teñen moi mala visibilidade.
