Encheu 20 euros de combustible nunha gasolineira da capital lucense e marchouse sen pagar, pero o simpa acaboulle saíndo caro, xa que foi identificado e condenado a saldar os seus débedas e a pagar ademais 360 euros de multa.
A sentenza considera probado que o 14 de setembro de 2018, o acusado acudiu ao volante do seu turismo, un Nissan Almera, á estación de servizo do centro comercial Carrefour —situada no quilómetro 501,6 da Nacional VI— e encheu 20 euros de combustible. Acto seguido, foise rapidamente do lugar sen abonar o importe. O home foi xulgado por estes feitos no xulgado de Instrución número 1 de Lugo e negou todas as acusacións na súa contra.
Segundo explicou, ese día non pagou o combustible, pero acudiu á gasolineira ao día seguinte e saldou a súa débeda. O xulgado conclúe que non hai ningunha constancia de que acusado regresase ao establecemento para pagar, "nin o día seguinte, nin en días posteriores, non constando, transcorrido máis dun ano, que se levou a cabo o pago".
A sentenza explica que o home tiña "a intención de enganar", polo que lle impón unha multa de dous meses con cota diaria de 6 euros como autor dun delito de estafa. Ademais, o fallo obrigoulle a indemnizar á gasolineira na cantidade de 20 euros, "cos intereses legais correspondentes" desde a data de comisión do delito.
O acusado presentou un recurso de apelación ante a Audiencia Provincial, alegando unha vez máis que pagou o combustible ao día seguinte. Con todo, o tribunal mantén a condena ao considerar que a sentenza do xuíz de Instrución "non é incoherente, nin irracional, nin absurda nin ilóxica", polo que unicamente a confirma.
