A terceira fase do Programa de Axuda Alimentaria ás persoas máis desfavorecidas de 2019, do Ministerio de Agricultura, Pesca e Alimentación, mobilizará en Galicia 1.583.406 quilos de alimentos, cun valor de 1.509.724,27 euros. Na provincia de Lugo repartiranse 234 toneladas que chegarán a máis de 8.000 beneficiarios.
O delegado do Goberno en Galicia, Javier Losada, supervisou este xoves o almacenamento e distribución de alimentos por parte de Cruz Vermella Española en Lugo, desde onde esta organización está a distribuír máis de cen toneladas de produtos alimentarios que recibirán familias da provincia e asociacións asistenciais.
O delegado estivo acompañado na súa visita pola subdelegada do Goberno en Lugo, Isabel Rodríguez; o presidente de Cruz Vermella Española en Lugo, Luis Abelleira, e o secretario provincial da organización, José Luis Fernández, así como o xefe da área de agricultura da Delegación do Goberno, Roberto Suárez.
No conxunto da comunidade, os alimentos desta terceira fase deposítanse nos nove centros habilitados por Cruz Vermella Española e a Federación de Bancos de Alimentos en Galicia. Posteriormente, as 440 organizacións asociadas de repartición distribuiranos entre 59.376 persoas necesitadas en situación de dependencia social ou económica.
Con esta fase ponse fin ao programa 2019 de axuda a persoas desfavorecidas. En total, prevese que sirva para repartir entre máis de 59.000 persoas 4.585.120 quilos de alimentos, por un valor de 4.387.773 euros.
