As incidencias causadas polo temporal Fabien que está a afectar á comunidade con fortes ventos deixaron sen luz este sábado a ao redor de nbsp;30.000&fogares na provincia –máis de 100.000 en toda Galicia–, segundo datos de Naturgy e Viesgo.
En varias zonas dos municipios de Pol, Antas de Ulla, O Corgo, Castroverde, Sober, Taboada, Sarria, Monforte, Xove, A Pontenova ou Viveiro, entre outros, a subministración eléctrica permaneceu cortada durante horas, xa que as brigadas despregadas polas distribuidoras eléctricas víronse desbordadas e tiveron dificultades para acceder ás avarías.
A maior parte destes cortes teñen a súa orixe na caída de árbores, ramas ou cortizas das árbores sobre as liñas do tendido eléctrico a causa do forte vento, que superou os 160 quilómetros por hora en distintos puntos.
O temporal, que mantén a súa virulencia, así como as dificultades de acceso ás liñas eléctricas afectadas están a complicar o traballo das brigadas.
UFD, a distribuidora eléctrica de Naturgy, mobilizou a preto de 600 persoas, entre brigadas, operadores de rede e da plataforma telefónica, para facer fronte aos problemas de subministración eléctrica. O despregamento inclúe máis de 170 vehículos e 45 camións, ademais de 130 grupos electrógenos co fin de axilizar a reposición da subministración nos casos nos que fosen necesarios. Reforzáronse, ademais, os equipos e a plataforma telefónica para atender as incidencias que se poidan producir ao longo deste fin de semana.
UFD está tamén en contacto "permanente" coa Axencia Galega de Emerxencias (AXEGA) co fin de coordinar calquera intervención que fose necesaria ante a posible interrupción da subministración de enerxía eléctrica elementos esenciais das poboacións galegas. A compañía informou de que continuará cos seus dispositivos despregados durante todo o día de hoxe e mentres dure a situación meteorolóxica adversa que está a provocar as incidencias na subministración de electricidade.
